بسم الله
روشن اولدی بو گجه منزل ویرانه بابا
گلموسن باش چکسن فوج اسیرانه بابا
آیریلان وقته دیدون آغلاما گلّم یانووا
انتظارم نچه مدتدی او پیمانه بابا
تانیا بولمدیم اولده یوزون کول بورویوب
هتک حرمت ئلییر کیم بله مهمانه بابا
ئوزغمیم چیخدی یادیمدان یوزووه باخماق همین
باتوب الان گورورم صورتون القانه بابا
اوقدر ضربه وروبلار دوداقون پارچالانوب
طاقتیم یوخدی باخام بو لب عطشانه بابا
بیر باشون اولسا بوحالی بدنی گورنه اولار
بنذر اوراق اولونان صفحه ی قرآنه بابا
بوغازون یاره سین عمم هامیدان یاخشی بولر
اللری باشدا قاچوب قور خولی میدانه بابا
خبریم اولمادی گودالیده کی حادثه دن
آغلیوردی حرمون وضع پریشانه بابا
ناگهان گوردولر عمم گلور امانه گلور
واحسینا دیور اللر بویانوب قانه بابا
ویراجازه سنه ئوز درد و غمیم دن دانیشیم
ناقه دن دوشدوم او وحشتلی بیابانه بابا
اوچ یاشی بیر قیز اولا دوره قرانلوق چول اولا
اوقیزین جسمی دوشر بیدکیمی لرزانه بابا
گه ساقا گه سولا قاچدیم ایاقیم دگدی داشا
باخمادیم هیچ ایاقیمدان سوزولن قانه بابا
یر تیکانلیقدی قاچاندا ئله بیل اینه باتور
ایلیشردی ایا قیم خار مغیلانه بابا
نقدر سسلدیم عمه سسیمه گلمدی سس
گوگلوم ایستوردی یتم غملی اسیرانه بابا
ناگهان گوردم ایکی آتلی نمایان اولدی
بیری سسلردی منیم آدیمی غیظانه بابا
تایتوبلر منه سسلندی بیری ترکیمه مین
دیدیم اصرار ئلمه ای منه بیگانه بابا
سیز سوروز مرکبوزی منده دالوزجاگلرم
تایتیشیدیم غمیلن جمع پریشانه بابا
نچه گوندور که بو ویرانه اولوب منزلیمیز
بورا منزلدی و یا مجلس غم خانه بابا
باخ خانیم عممه قدی قوجالار تک بوکولوب
آغاروب زلفی دوزوب ظلم فراوانه بابا
اسرا جمله سی مدیونیدی زینب بی بی مه
آغلیوب بسکه اسیران و شهیدانه بابا
من یاتان وقته بیبیم بالش ایدرئوز دیزینی
آغلاسام بوسه ورار دیده ی گریانه بابا
طاقتیم یوخدی گیدورسن منیده بوردان آپار
یور قونام قوی باشوی سینه ی سوزانه بابا
بیزه چوخداندی که غفاری اولوب شعر یازان
بیر صله ویر اولا تا تحفه ی شاهانه بابا
اسکندر غفاری