بسم الله
توکمه گوزوون یاشینی ای نازلی سکینه
گیت عمه قوجاقینه دعا ایت بوغمینه
آغلاتما منی بیربله گوز یاشووا قربان
گورنه سارالوب صورتون ای لبلری عطشان
گل تک دوداغون پارچالالوب گرچه سوسوزدان
ایتمه منی شرمنده باجی قلبیم اولورقان
گل بیرده قوجاقلاش منیلن بو دم آخر
اولدوم بوگونی آخرته منده مسافر
بوچولده منی ئولدورجک فرقه ی کافر
نیلر سیزیلن اولسوز اسیر لشکر جائر
دیدار دوباره باجی جان محشره قالدی
آئینه ی عمرومی فلکده داشا چالدی
مندن داخی ال ئوز منی سیزدن ویرن آلدی
بی چاره آنام باشینا دشمن قارا سالدی
اسکندر غفاری