بسم الله
دردیمه یا فاطمه یوخدور دوا سندن صورا
منزلیم اولموش داخی ماتم سرا سندن صورا
ای علینون همدمی غملر آلوبدوردوره می
هر طرفدن اولدوم آماج بلا سندن صورا
سن گیدندن آغلاماقدان گوزلریم دینجلمیوب
غم بلوتی یاغدیرور اشک بکا سندن صورا
زورق عمروم اولوبدور واژگون غم بحرینه
یوخدی بیر ناجی الیمدن تا دوتاسندن صورا
چوخلاری سسلرمنی من سسلرم یا فاطمه
بیر کسیم یوخدور مدد کاریم اولا سندن صورا
ای سینان پهلو منیمده قلبیمه بیر چاره قیل
آزقالور روحیم بدندن آیریلا سندن صورا
من دییردیم دردیمی سن دردیوی بولدورمدون
قالمیشام تک ایلورم آه و نوا سندن صورا
غصه لر اود تک قالانمیش سینه ی سوزانیمه
درد الیندن یاورون گیتسون هارا سندن صورا
بیر اوجا حالتده هردم ایستورم قان آغلیام
دورت بالون منلن اولانلار هم صدا سندن صورا
شهر یثربده بونازلی زینبی یوخ دیند یرن
اشکینی گوزدن سیله گوگلین آلا سندن صورا
هر قیزین ئولسه آناسی سسلییر ایوای ننه
آغلیار صبحه کیمی بنت العزا سندن صورا
سن آچان سجاده نین اوسته دورار وقت نماز
چون برابردی سند ثبتی بسا سندن صورا
رکعتینینده دوتار سن تک بیر اللی چون قنوت
ایستییر کل مریضانه شفا سندن صورا
وای اوساعتدن دیه ایوده یرون بوشدور آنا
گور آتام قالمیش نه احواله آناسندن صورا
مجتبی ایودن گیدر گونده ایکی یول کوچیه
گوزلری آغلار گلر نازلی بالا سندن صورا
من د ید یم اوغلوم حسن هرگون گید ورسن تک ها را
سویلدی یوخدور بولن بی کس بابا سندن صورا
من گرک گونده گیدم ثانی وران سیلی یره
دردیمی بولمور نه خویش و اقربا سندن صورا
حضرت زهرا آنام سیلی دگن وقته دیدی
بولمسین بیر کس بوجریانی بالاسندن صورا
بیر نفر یوخدور قیزیم کلثومه دلداری ویره
آغلیان وقته دییر بیکس آنا سندن صورا
قالمیشام مظلوم حسینیم قلبیمی قان ایلیوب
ایستیور مندن سنی صبح و مسا سندن صورا
من مزار اوسته گلن وقته دیور منده گلیم
قورخورام ایوده قالا چوخ آغلیا سندن صورا
سویلرم گلسون بو شرطیله اوجدان آغلاما
طاقتی یوخدور داخی ایوده قالا سندن صورا
بیت الاحزاندا اولور ذهنینده غملی خاطره
محنتی یاده سالور بوغم سرا سندن صورا
لطف ئله غفاریه ای نور چشم مصطفی
چونکه یوخ محبوبه ی مشکل گشا سندن صورا
اسکندر غفاری