بسم الله
باشوون اوسته منی بیر بله آغلاتما اوغول
جگریم یاندی گوزوندن آتووی آتما اوغول
گوزومون نوری غروب ایتدی باخان وقته سنه
بوچتین حالیده شمشیریم عصا اولدی منه
ای منه حاصل عمرومده اولان سوژه ی غم
منم عالمده اولان واژه ی سلطان الم
سنه قیمت قویا خالق کیمی حاشا بشری
بینوب حق سنی قبلاً اولا خلقت اثری
یوزومی قانلی یوزه قویسام اورک ساکت اولار
بنظرون وار او گله گر اولا پژمرده سولار
هر اوخون یاره سی جسمونده آچوب چشمه ی قان
سیل اشکیم قاریشوب قانووه ای جسمیمه جان
گون دگور جسمیوه قان چشمه لری جوش ئلیور
حالتون عالم معنانی سیه پوش ئلیور
او قدر آغلامیشام تنگه دوشوبدور نفسیم
آز قالور پیک اجل بوردا اولا دادرسیم
جان ویرن وقته اوغول گورمیه ای کاش آتاسی
منی بو حاله سالانون گوروم ئولسون بالاسی
چوخ بالا داغی گورن واردی ولی منکیمی یوخ
بوغازون گل تک آچوبدور علی اوچ شعبه لی اوخ
ایو ییخان نیزه دگوبدور داغیلان پیکرووه
سوزولور باش قانی سیمای ملک منظرووه
سنی بو حالدا نجه گوردوم ایتیردیم ئوزومی
گیجلوب باشیم همان لحظه ده یومدوم گوزومی
ئوزومه گل جک اوغول قدری سوروندوم او زمان
یتیشین جک سنه اولموشدی آدون ورد زبان
نیزه لر اوخلار آلوبدور سنی آغوشه علی
طاقتیم یوخدی باخام ایندی بو منقوشه علی
گورمسون هیچ بیر آتا منکیمی اوغلان داغینی
منه گوستردی فلک قلبی ایدن قان داغینی
سنی گورجک اورگیم نار محبتده یانور
ئولموشم بلکه باشون اوسته بو روحیم دولانور
گوزومون یاشی یاغیش تک توکولور گل یوزووه
سن ولی آلدون اوغول رتبه ی اعلا ئوزووه
رسمیدور آغلیانون غصه لی قلبی بوشالار
گردیسون بیرده بابا اوندا بو قلبیم خوش اولار
خیمه لرده نگران چوخدی سنون گوزلیینون
بولمویولر بلشوب قانه داغیلمیش بدنون
سنی سالم یولا سالمیشلاریمون وای حالینا
ساچلارین اللره آلمیشلاریمون وای حالینا
درد غفاری آشوب داشدی ئله چاره آقا
سنی اکبر جانی لطف ایله او غمخواره آقا
اسکندر غفاری