بسم الله
سس دوشوب لشکره سقای لب عطشان یخلوب
نهر علقمده اولوب قانینه غلطان یخلوب
بوس ایدن ام بنین گونده کی گوزلر سوزولوب
آننینا قان ئله بیل شبنم مرجان دوزولوب
باخدی حسرتله سو مشکینه امیدی ئوزولوب
اوقدر دوغرانوب اعضا اوجا قامت بوزولوب
دیدیلر یالقوز حسینون ایوی الان یخلوب
اوخ نجه دیدی بو غازدان آچیلوب گل سیاقی
اللری یوخدی چکه یتری حسینون دایاقی
آناسی بولموری سروین کسیلوب خول بوداقی
باشینون قانی سوزوب گوزلره گورمور قاباقی
کاشف الکرب حسین حامی قرآن یخلوب
هر گلن کافر اوقولسوز بدنه یاره ورور
بیری غیضیله ایاق ضربه سی همواره ورور
بیری دل یاره سی اول یاره لی سرداره ورور
بیر نفر نیزه نی پهلوی علمداره ورور
بعضی لر ایتدی تعجب یل میدان یخلوب
گر سوسوز لبلره سو دگسه حرارت آزالار
ولی سو اولماسا لبلر قورویوب پارچالانار
گوز لیولر آقام عباسی لب عطشان بالالار
آزقالور ولوله افلاکه اوشاقلار سالالار
بولمیولر که عمو ساقی طفلان یخلوب
ئوز دولاند یردی خیامه طرف اول کان وفا
دیدی درک ایله علمدارووی ای بی کس آقا
آز قالور باشیمی تندن آییرا قوم دغا
گل آنام فاطمه علقمده ایدور آ ه و نوا
قارداشون قولاری یوخ پیکری القان یخلوب
گل باخوم حضرت زهرا چوخ ئوپن گوزلرووه
مست ایدن روحیمی سیمای ملک منظرووه
منی قربان لیق حساب ایله علی اصغرووه
چون امید واریدی لب تشنه لرون نوکرووه
ولی شرمنده دی علقمده پریشان یخلوب
خیمه ده قالمیشیدی قیزلار الینده اتگیم
گل منیم باشیمه باش چک اولا خوشحال اورگیم
دیمسون لر که منیم یوخدی بوچولده کمگیم
دشمنون اوخلارینا تکیه ایدوبدور کورگیم
جانینی بذل ئلیین جانووه قربان یخلوب
گتورن وقته آغور مشکی ایشیم اولدی چتین
تاپدیلار نقطه ی حسا سیمی بو لشکر کین
دورت طرفدن اوخ آتانلار ئلدی فوری کمین
مشک اولوب اوخلارا آماج وسوئی نقش زمین
مرکب اوستن یره پیمانه ی پیمان یخلوب
گوزلرم من سنی قارداش نگران قویما منی
گل آنام فاطمه آرا م ایده بولمور حسنی
منه دلداری ویرور اهل کسا انجمنی
دلیم آغزیمدا دولانمور چاغورام داده سنی
گل ئوزون گورنجه بو پیکری داغان یخلوب
اسکندر غفاری
